1Cor 4 | YML | STEP | Side bani'odi 'wa na nuanuayedi faifaima. 'Ima Keliso yana tofolovavo, Yaubada yana nuanua givagivadi 'adi to'isave'avinavo, bega a na lulu'ivoneyedi 'waimie.

1 Corinthians 4

Yaubada 'aisena tovenua'ivina ava'aibe 'atumaina wata ava'aibe sakoina.

1 Side bani'odi 'wa na nuanuayedi faifaima. 'Ima Keliso yana tofolovavo, Yaubada yana nuanua givagivadi 'adi to'isave'avinavo, bega a na lulu'ivoneyedi 'waimie. 2 'Akonadi 'wa 'asetai to'isave'avinavo i lubwainedi ma yadi dumwebika yadi toveimea yana nuanua i na 'i'idewadi. 3 'Ai'edi 'wa na venua'ivina yau to'isave'avina 'atumaiku 'alo sakoiku, 'waikuye kebu nani bwaikina. Wata bani'odi 'ai'edi mali tomotoga i na venua'ivina faifaiku, kebu tamu ava'ai. Yau wata kebu a da vevenua'ivina tauniku faifaiku yaku folova 'atumaina 'alo kebu, i na nunago a na vekali. 4 'Aku vebae 'waineye a lutonovi yaku folova matatabuna 'waineye kebu a da sakonaga, siwe 'aku vebaenina 'wainega kebu 'ami fata 'wa na 'asetai a vona mogitana 'alo kebu. 'Ada Toveimea Iesu 'aiseotogina i 'asetaku yaku sauluva 'adi tovenua'ivina. 5 Begaidi kebu i da lubwaineni tamu tomogo yana sauluva faifaina 'wa na venua'ivina. Tutuyanina 'ada Toveimea Iesu i na vila-vaitugani naninidi givagivadi dudubala nageneye wata tomotoga yadi nuanua givagivadi i na sivemagesedi. Tutuyanina 'waineye tomotoga 'aitamogana 'aitamogana 'ana subia i na veluagai Yaubada 'wainega yana sauluva 'adi 'isa'isa bani'odi. Begaidi tutuya de'e kebu awave'atumai 'alo awavesako 'ana tutuya, 'awaie Keliso nani matatabuna i na sivemagesedi 'ada fata bei ta na venua'ivina.

Faulo i talaboda, me Kolinita kebu taunidi i na awa'ai'aidi.

6 Ekwavo, a vonaga a vo, Yau wata Afolosa yami to'isave'avinavo, Yaubada faifaina 'a folofolova 'waimie,” wata a vo, Kebu ta na venua'ivina mali tomotoga yadi sauluva faifaidi.” Vonanidi wata yaku vona 'ifwaidi 'adi 'aseta faifaina, yau wata Afolosa a awatalatutulema nika nuami i na magetadi. A awatalatutulemaga nuanuaku tamu yada vona 'wa na 'aseta-'atumaia vonanina i vo, Veimea tonovidi kebu 'wa na bailedi.” 'Ai'edi veimea tonovidi 'wa na vematayakeyakediga, kebu taunimi 'wa na awa'ai'aimi 'ami to'edakumetavo faifaidi, we'e mali to'edakumetavo 'wa na awaobuobuyedi. 7 Kebu tamu aitoi i da kialakaimiga we'e awale taunimi 'wa awa'ai'aimi? Nani matatabuna 'waimie i 'eno'enovi Yaubada yana 'anivelena, kebu tamu nani taunimi nimamiega i da souyeni, we'e awale taunimi 'wa awa'ai'aimi 'wa da vo naninidi taunimi 'ami 'idewadewa.

8 'Omi me Kolinita 'ami 'isa. Igodi yami nuanua 'wa vo, 'Ima 'akonadi 'ama fata nani matatabuna 'waidie, 'ai'aiwabu bwaikina 'a veluagai. 'Ima 'a ve-kini ma yama veimea.” De'e bani'odi 'wa vonevoneyediga, igodi 'wa na vebwaika-'iawema siwe 'ai'edi mogitana 'omi tomotoga bwaikimi Yaubada mataneye yau a da sosoana bwaikina nika 'omi, wata 'ima taiadi ta da veveimea. 9 'Ana 'isa 'waikuye Yaubada i veimea 'ima tomata'aulele 'a vemuliotoga. Basenadi tolugavia 'adi gaviavo i 'i'ive'avinidi i lulu'ivevenedi tomotoga matadie bega i na 'isadewadi mulieta i luluvewafadi. Wata 'ima bani'odi mali tomotoga i kumekumeta we'e 'ima i vevemuliema, anelose wata tomia fwayafwaya matatabudi i 'i'isadewama 'wa da vo 'a da nunago 'a na wafa. 10 Keliso faifaina 'a vetofolova begaidi mali tomotoga i fali'wave'wavema, we'e 'omi Keliso yana tomotoga, igodina yami 'aseta bwaikina. 'Ima tomotoga mweama we'e 'omi igodina toketokemi. Mali tomotoga i awaobuobuyema we'e 'omi igodina ma 'ami ve'ililibu. 11 Basenadi wata 'asiau 'a laselase wata 'anigoma i lalala, 'ama kaleko 'anilabulabu'idi, tomotoga i nikenikema wata kebu yama vanuga 'a miayaba-vuvua. 12 'A toke 'a folofolova nimamega taunima 'ama 'aivaita faifaina. Tomotoga i yagayagaima we'e 'ima faifaidi 'a vevelu'ui Yaubada i na vesauluva 'atumaina 'waidie, i 'i'ivekokovima, siwe 'a totokemaigema. 13 Tomotoga i awavesakoyema, we'e 'ima vona bikadiega yadi vonanidi 'a tutulidi. Mogitana 'ima bani'odi 'ula'ula wata yogo tomotoga matadie.

S8 Ve 3:17S11 2 Kol 11:23-27S12 Fol 18:3 Luk 6:28

Faulo i vo, Me Kolinita natukwavo.”

14 De'e bani'odi a vonevoneyediga yaku kiluma 'wainega, kebu a da vo, A na 'ivebunumayagidi,” we'e mogitana fai 'omi bani'odi natukwavo a nuakalikaliemi bega nuanuaku a na awave'ede'edemi ve tonovidi 'waidiega. 15 Avinodi 'ami to'isave'avinavo fuedi i veve 'waimie Keliso faifaina, siwe tamamiavo kebu fuediga. Yau 'aiseotogiku tamami fai a kumeta a lau'age 'waimie Iesu Keliso Valana 'Atumaina faifaina nika 'wa vetumagana 'wa luku yana 'Aila'a nageneye 'wa da vo a da venatunemi. 16 Fai yau tamami a na vonemi, nuanuaku 'wa na salaku. 17 Fai nuanuaku 'wa na salaku Timoti a voneni i na wai 'waimie. Taunina natuku Keliso yana 'Aila'a 'waineye a nuakalikalieni, dumwena bikana 'ada Toveimea yana nuanua i 'i'idewadi. A vetuneiga 'ami tolinuata'i faifaina, i na vonemi 'wa na nuani yaku mia 'ivauna Iesu Keliso 'waineye 'ana sauluva, sauluvanidi faifaidi a veve tovetumaganavo 'adi 'aila'a tulina tulina 'waidie, 'awalawa matatabuna 'waidie.

18 'Ifwaimi ma yami fwausa taunimi 'wa awa'ai'aimi 'wa vo, 'A nuani Faulo kebu i na mai, i kololoyema.” 19 Siwe 'ai'edi 'Auvea i na tauyekuga sai'afoga a na wai tomotoganidi i awa'ai'aidiga a na 'isedi a na 'asetadi ma yadi toketokena i folofolova 'alo 'awa'avadi i vonavonamo. 20 A na 'asetadi fai 'ida Yaubada i veveimeyedaga yada toketokena i veleveleda, kebu 'awa'avada i da vonavonamo. 21 Taunimi 'wa na venua'ivina ava'ai nuanuami. Nuanuami a na wai vematavuloga a na velemi yami sauluva sakoidi faifaidi, 'alo nuanuami nagami yami sauluva 'wa na 'ive'atumaidi mulieta ma yaku nuakalikali a na wai bonaku bikanega a na vonemi?

S16 Fmi 3:17S17 Fmi 2:22S20 1 Kol 2:4